2010年2月7日
預約左8:30am食早餐，我哋7:30am起身再浸多一次溫泉。今朝無咩人，得我同另外一個日本女仔浸。朝早浸完溫泉個人特別精神。
早餐係日式嘅，都幾好味。我真係好鍾意食日本米，成碗飯食晒，睇嚟真係肥幾磅返香港！
呢度嘅lobby有一部電腦，我同K都爭取時間check吓email，同埋有自助coffee & tea，中間仲有個暖爐，喺度坐低飲杯咖啡真係好舒服。
10:00am就要check out喇。Check out之後我哋就揸車去到酒店對面嘅無料parking，因為我哋打算由河口湖畔站坐ropeway上去睇富士山，來回700yen，我哋覺得好抵呀，因為上面睇嘅富士山好唔同，真係好靚，有好多影相嘅靚位。
回程之後我哋再喺酒店附近行左一陣，呢間Cheese Cake shop就喺我哋酒店隔離。
之後我哋就去左河口湖駅，呢度係日本一百大名駅之一。喺站隔離泊車頭十五分鐘係免費嘅，我哋爭取時間喺呢個有富士山作為背景嘅站影相。不過要留意停車場嘅飛千祈唔好整皺，因為會出唔到閘咖，我哋就係因為咁整左好耐先走得！
沿途經過富士淺間神社，感覺好平靜，忍唔住落車影幅相。
因為唔想太夜先去到熱川，我哋決定去多一個景點山中湖，之後食埋lunch就走喇。
山中湖係富士五湖中最淺嘅湖，但風景依然好靚，好舒服。我哋去左Denny's食lunch，仲叫左個Devil Ice-cream做甜品。凍冰冰唔係咁易買到雪糕咖，之前見到好多賣雪糕嘅舖頭都關左門呀。
喺接近到熱川嘅酒店前，我哋先去河津七滝，同伊豆舞孃影相，再出發去今晚住嘅熱川大和館，一路上我哋都仲keep住見到富士山咖。
今晚住嘅熱川大和館都幾難搵，GPS又唔係太清楚，結果我哋第一次入左一間錯嘅酒店。原來我哋住嗰間酒店喺對面咖咋。去到之後reception姐姐衝出嚟迎接我哋，仲一個人幫我哋拎晒啲行李，好勁呀！我哋都唔忍心要幫佢一把。入到lobby，reception姐姐就叫我哋坐低，跟住就有人拎左碗綠茶同糕點比我哋，又幾好味喎。
酒店啲職員好nice好熱情，我哋先去左天台上嘅貸切風呂。一個鐘2,600yen，可惜我哋浸嘅時候已經天黑,但係我都聽到前面嘅海浪聲，如果天光時一路浸一路望住個海一定好開心！
晚飯喺1/F嘅餐廳食，招呼我哋嘅係一位嬸嬸，佢好好人又好好笑，佢教我日本話我又教佢廣東話。今晚有鐵板燒同和牛steak食,好味！我哋又叫左Asahi飲，慶祝我哋嘅honeymoon。
休息左一陣又係浸溫泉時間喇。男女湯都無人，不過唔知係咪呢排浸得太多，所以浸左一陣就走喇。
沒有留言:
張貼留言