天后甜品 - 天后

首先, 我通常寫食評嘅網誌都有相睇, 呢篇除外...

話說尋晚喺中環賞月過後, 大家好有興緻食甜品. 本來想落去筲箕灣嘅"老媽"食雪花冰, 但望望錶都接近12點, 所以決定落天后穩陣d.

落到天后泊好車, 見到呢間"天后甜品"有雪花冰食, 又咁啱有位, ニ話不說坐低, 咁就出事喇.

女侍應(紥馬尾)非常黑面, 我哋點咗其中一個甜品, 佢話要等30分鐘, 我哋都嚇一跳, 咁問佢有乜甜品唔駛等咁耐, 佢又好似唔願答咁. 全程無笑容, 好似嚟幫襯就要睇佢面色咁.

(天后咁多甜品舖,唔一定要嚟呢間啫!? 或者喺OpenRice嘅"喊面"指數一直增加嘅時候, 佢先會明白?)

落完單之後要即刻俾錢, 後來我哋知道佢係驚啲客等得太耐會走, 所以收錢先. (既然知道自己嘅問題係慢, 驚啲客會走, 點解唔改善? 反而先同客人收錢? 咁可以解決問題咩?)

黑面女侍應收咗我哋$100, 完全無意識要找錢 (我哋叫咗$93嘅食物), 等咗10分鐘佢都唔找, 我哋就開口問佢, 佢"哦"一聲入舖攞返$7俾我哋, 一聲唔好意思都無.

你唔係以為客人奉子要俾貼士你啩? 如果服務態度好$70貼士我都會俾, but唔係呢間舖囉

等咗20分鐘乜都未嚟, 望吓周圍有幾張枱早過我哋嚟都未有得食, 咁就諗住再等吓啦

之後隔籬枱食完走咗, 嚟咗一班新客, 過咗10分鐘班新客叫嘅雪花冰竟然先嚟.

我哋問另外一個男侍應, 佢話我哋張單係下一張做 (當然亦係一句唔好意思都無

), 再等10分鐘都係未嚟, 而到另外一張枱嘅客都有得食嘅時候, 我哋真係火都嚟埋, 即刻問佢攞返錢走. (所以話, 唔好以為先同客收錢係一定work)

其實我哋點嘅其中一個甜品只係一碗啫哩, 點解都要等30分鐘!!??

其實尋晚中秋綵燈, 維園多人係預咗, 呢間舖擺多咗10幾張枱喺街應付人流, 但係有無考慮過自己舖頭嘅裝備唔夠加埋啲趕客黑面侍應最終會害咗你哋呢?

之後我哋殺咗落西灣河嘅明記, 雖然都係要等位同等食物 (仲要唔係等好耐, 5-10分鐘左右咋), 但係人哋最後都不斷同我哋講唔好意思, 猛解釋因為中秋所以客人特別多, 咁至係咖嘛..天后甜品, 你要好好向人學習呀!