呢幾日天氣轉凍, 市區只係得八、九度, 睇新聞話打鼓嶺在凌晨時更跌至攝氏零下一度, 喺香港錄得零下嘅温度真係好少有. 坐喺屋企真係feel到啲寒氣從四方八面吹來.
既然咁凍, 最好都係打邊爐. 前排K同佢嘅同事去稻香打邊爐, 覺得唔錯, 又多嘢食, 講到咁好, 梗係要試吓啦!
我哋最後決定去灣仔分店, 因為怕銅鑼灣店太多人, 最後都無揀錯, 等咗大概十分鐘就有位喇.
一坐低, 侍應姐姐就放低咗一盤醬料, 原來呢度嘅醬汁係自己調校嘅, 平日只係齋點豉油嘅我都貪得意左溝右溝, 出嚟嘅味道又唔錯噃.
因為太肚餓, 所以點咗豬骨煲湯底, 起碼啲嘢食未嚟之前都可以食住豬骨先! 
呢度唔係任叫任食, 但係因為我哋喺九點後入座, 所以大部份嘅食物都會比正常價錢平啲.
最近唔知點解鐘意咗食脆肉鯇魚片, 雖然K唔食魚, 但係無所謂, 我一個人殺晒!
整體嚟講呢度啲食物好新鮮, 又乾淨, 侍應姐姐服務態度好好, 非常之好笑容同有禮貌, 仲成日主動加湯同加茶添.
食飽飽, 個人即刻暖番晒!
沒有留言:
張貼留言