Beira Rio Wine Bar-Grill - 鯉景灣

年初二, K的開年飯改了到晚上, 我們突然多出了一餐午飯, 要自己搞掂. 

決定到鯉景灣博博運氣, 希望能碰上一些已經開門營業的餐廳.  可能因為市道不景, 原來不少餐廳已開始營業了.  經過其中一間名為Beira Rio Wine Bar-Grill的小餐廳, 他們的午市套餐頗吸引, 決定試試.

餐包暖暖的, 可惜那個忌廉磨菇湯不夠熱, 大打折扣.

一個$70多元的set lunch, 已包了餐湯、沙律、主菜、甜品及餐飲, 都算抵食.

花開富貴

恭喜發財!!  祝各位朋友在牛年大吉大利, 心想事成, 身體健康, 財運亨通.

花開富貴!!

行花市

今年, 總共行咗四次花市.

第一次: 年廿六, 因為知道無咁多人, 唔駛迫, 可以慢慢行.

第二次: 年廿八, 食完團年飯, 同埋大佬、嫂嫂與及佢哋嘅兩隻小寶貝一齊行, 一路上兩隻小寶貝仲不斷俾人"抽水".

第三次: 年廿九, 因為趕住買盤水仙, 所以雖然超級迫人, 但係都同嫂嫂衝咗入去…..

第四次: 年卅十, 每年都會約埋幾個舊同事一齊喺呢一日行花市, 通常會迫到透唔到氣, 今年亦唔例外,我哋仲要企喺賣食嘢個位等咗十幾分鐘先”塞”到入乾貨區…

今年花市檔口嘅數目雖然少咗, 但我覺得都幾多嘢睇, 有好多用”牛”字為題材嘅精品, 最後都買咗一對牛公仔同埋一個牛角頸枕應吓景. 今年 有啲貨品都令我留下咗深刻印象:

全場最好賣嘅吹氣雞蛋仔:

手工剪紙:

幾可亂真嘅迷你生菓蔬菜:

小吉搖頭公仔, 經過幾次都有停低考慮買唔買, 不過最後都無買:

胡桃夾子擺設:

用牛角頸枕搭成嘅金牛山, 今年嘅收穫之一:

年廿六晚, 帶埋呢對牛牛公仔一齊搭巴士返屋企 

恭喜發財!!

洗白白

新正頭, 間屋要洗邋遢, 個人要洗邋遢, 架車當然都要洗邋遢.

以前屋企樓下有個伯伯幫人抹車, 但自從佢喺幾個月前"失踪"咗之後, 我哋嘅"老爺仔"就要自生自滅...後來, 我哋就間中會帶"老爺仔"去將軍澳嘅Shell洗白白.

點解要山長水遠去到將軍澳呢? 因為呢度係用全自動電腦洗車, K話乾淨啲喎...而喺香港區我哋又暫時未揾倒有呢種服務..

個個車主都係等到呢日先洗車..唉, 都預咗會大排長龍咖喇!

4:50pm - 到達 

5:10pm - 前面車嘅金毛犬都等到無晒表情

5:45pm - 條龍好似無短過, 仲有排等...

6:15pm - 前面都仲有五架車等緊....

最後, 我哋喺6:55pm完成咗呢個神聖嘅任務, 歷時兩小時零五分鐘!

簡單厨房 - 將軍澳

年卅十, 今日嘅首要任務, 同埋唯一嘅一個任務, 就係洗車.

因為要洗車, 所以要入將軍澳.  好日都唔入將軍澳嘅我同埋K, 唯有打電話俾K嘅妹妹求救, 睇吓將軍澳有乜嘢好食, 諗住食咗lunch先去洗車...

最後K妹提議咗去新都城二期, 郭少芸開嘅"簡單厨房".

一睇餐牌, 真係花多眼亂, 可多嘢食揀. 可能因為肚餓嘅關係, 所以覺得樣樣嘢都好好食.  經過一輪苦思, 最後K揀咗石頭鍋飯, 我就揀咗燴牛肉天使麵.  食物質素都幾唔錯, 起碼令我會想再去幫襯 (如果再入將軍澳的話..)

唯一係我叫嘅Ice Mocha, 賣相唔錯, 但飲落就麻麻地...算啦, 有時又真係唔可以樣樣嘢都要求咁高嘅! 

後話 - 去到新都城咁啱見到謝安琪喺度表演, 佢真人都幾靚喎!

彭慶記 - 跑馬地

今朝要陪爸爸走兩場, 睇兩個醫生, 由屋企出發去金鐘, 然後去跑馬地, 攪掂都已經接近一點半.  好彩大佬同嫂嫂接埋K過嚟跑馬地, 可以喺附近嘅彭慶記食午飯.

可能昨晚啲人玩得夜咗, 所以餐館裡面無乜客人, 老闆亦好得閒, 不時同我哋傾偈.

話梅炆豬手 - 啲豬手酸酸甜甜好開胃, 最後連啲話梅都食埋..

無錯, 又係魚香茄子煲!

老闆非常健談又好客, 我們一面吃, 他一面告訴我們新鮮雞和冰鮮雞的分別 (當日新鮮雞正賣緊$70一斤!), 與及他店裡的干扁四季豆和琵琶豆腐與出面的有甚麼分別.  這餐飯, 真的學到唔少嘢!

辦年貨

鼠年辦工嘅最後一日, 放咗工, 急急腳過灣仔, 因為約咗家人食團年飯. 

途經灣仔道, 突然醒起未買豆沙角. 即刻飛撲去東方小祇園, 點知, 叔叔話....已經賣晒  叫我去軒尼詩道分店試吓.

去到, 見到一條小小嘅人龍, 全部都係排隊買豆沙角, 好彩賣嘢嘅幾位阿姐相當快手, 所以都唔洗等好耐.  况且, 我覺得過年買嘢要排吓隊先有氣氛 

除了豆沙角, 還有其他林林總總的賀年食品:

煎堆碌碌, 金銀滿屋!!

輪到我, 正想開口同阿姐講我要幾多豆沙角時, 突然有一個年約四十多歲嘅男子, 伸手攞咗兩隻豆沙角, 仲即刻擺入口, 阿姐見到就即刻喝住佢, 然後呢個男子就喺個口度攞番隻豆沙角出嚟, 講咗一句: "車! 唔試得咖!? 俾番你囉!" 然後就一手將嗰隻豆沙角拋番落個盤度, 好彩拋唔中啫

如果拋中咗, 我應該唔會買.