2010年2月4日
今朝準時0630起身，梳洗之後就用九秒九嘅速度上左9/F，浸多次溫泉，同埋邊浸邊睇日出。
今朝發覺個地下有好多霜，好凍呀！
行去露天溫泉既時候，牙關打震，即時要跳入溫泉裡面！
浸完溫泉收拾好行李就去食早餐喇。雖然唔算係好好食，但值得推介佢哋嘅麵包,好多款式，個個款都熱辣辣，好味！
酒店嘅shuttle bus話就話係15分鐘一斑車，但係我哋一上車司機哥哥就問我哋係想去巴士站定火車站,而且仲即刻開車添，good service！
08:39登上去有馬口嘅火車，向大阪站進發！今次因為上嘅唔係快速線，所以站站停，坐多十個站。。
返到大阪站，拎番件大行李,10:13就上左去關西空港嘅rapid train。大概11:20已經去到機場辦理check in手續，見時間尚早 （12:35先boarding)，我哋決定搏一搏，去番離機場一個站嘅Rinku Town Outlet行一趟。
我哋買左兩張南海電鐵350yen嘅飛,上到車都知唔對路咖喇，架車咁靚嘅？不過諗住坐一個站之嘛，無所謂啦。點知一開車無耐就有位職員姐姐問我哋攞張飛嚟睇，跟住就同我哋講每人要補100yen，好彩小小哋係100yen。。
落車之後，我哋先發覺原來個outlet離車站都有一段距離，就好似Yokohama個outlet咁，要行10分鐘，但係橫掂都嚟到，點都要去一去咖啦！好彩最後都有收穫，買左件As Know As嘅大褸。
我同K喺outlet因為失散左，差唔多12:20先搵返大家。跑到車站先發覺下一斑去機場嘅火車要12:34先到，好趕呀！！落車之後我哋就急急腳衝去閘口，中間過X-ray又超級慢。。好彩最後都趕得切，仲有人遲過我哋添！
去東京嘅機程大概45分鐘，兩點零就到喇。出左閘聞到好香嘅咖喱味，一於食個咖喱飯先去拎車。
今次我哋同Nissan直接租車，counter嘅小姐問我哋識唔識講國語，原來佢係台灣過嚟嘅。
由機場坐shuttle bus去Nissan拎車，坐左15分鐘先到，同上次喺北海道相比,呢度算遠喇。
呢架就係我哋今次嘅戰車喇。原來架Cube仔幾寬敞咖，個hand brake喺腳位。不過個GPS就認真麻麻，搵路線要等好耐，同上次喺北海道租嗰架差好遠。
我哋今晚入住嘅Prince Hotel Karuizawa,無料路程要四個幾鐘先到，有料就三個幾鐘。因為我哋計過趕到去啲舖頭都應該close晒,加上行有料要比4000幾yen,所以最後都係揀左行無料嘅路線。
點知一路上好塞車，睇住個GPS由開始預定到達時間係19:50一路推遲到20:00
->21:00 -> 21:50，真係無晒心機。
去到3/4路程，我哋決定先喺吉野家買個牛井飯食先，因為去到輕井澤都唔知有無野食喇。
一路上都唔見有雪，出面嘅氣溫顯示係0度，我哋都好擔心去到目的地會見唔到雪。後來一轉入長野方向就開始見到路邊有積雪喇。
之後我哋轉左入一條九曲十三彎嘅路，K揸得好小心，因為路上有好多black ice呀！周圍好黑好恐怖，中間K仲話見到有野豬添。。
條九曲十三彎嘅路足足行左半個鐘，回程時真係要搵過第兩條路行先得！
幾經辛苦去到酒店check in，reception哥哥話我哋而家喺West Wing，而我哋book左嘅係East Wing，所以要揸返車過去，無辦法啦，又上車。
原來K book左嘅係cottage，係一間小屋。我哋間小屋近輕井澤站南口，隔離就係outlet喇。
我哋check in左，泊好架車，酒店有架shuttle bus載我哋去到小屋門口。
小屋好乾淨企理，有兩間房，仲有個細廳可以坐吓睇吓電視。我哋喺Jalan book呢間酒店，只係10000yen一晚，好抵呀！
Settle左之後，我哋出左去行一陣，好凍呀！掂過啲雪之後隻手僵晒，不過好開心，因為之前我哋plan呢個honeymoon之旅係諗住去一個有雪嘅地方，最後願望達成，多謝你呀K!
輕井澤 Prince Hotel : http://www.princehotels.co.jp/karuizawa-area/
