Happy New Year!!
今年除夕我同K去到尖東海徬倒數睇煙火，我哋兩個都係第一次嚟呢度倒數，十點幾嚟到尖沙咀，文化中心已經封左路唔比入喇。
十九八七六五四三二一，2011年終於來臨喇。企左一個鐘，睇煙花睇左四分半鐘。。似乎啲煙花喺電視睇好似靚啲喎。
希望所有朋友可以度過一個和平，開心同健康嘅2011年！
2010年12月31日 星期五
2010年12月11日 星期六
Day 10 涉谷
2010年2月10日
嚟到Honeymoon旅程嘅最後一日喇。我哋十點幾check out，放低左啲行李喺酒店同埋book左2:00pm嘅Airport Limousine Bus。今日因為時間唔係太多，我哋主要會留返喺涉谷。
首先去01 City，但係都係無收穫，之後諗住去Parco，突然聞到一陣好香嘅味道，原來我哋經過一間炭火燒肉店，一於入去食個lunch先。原來呢間舖有可多分店咖，最出名係+燒牛舌，佢嘅飯+牛舌湯，全部都好好味。呢間舖頭已經被我哋列入為其中一間favourite食店喇。
行完Parco同Seibu，我哋去埋Doutor買咖啡粉，就返酒店準備上車喇。其實我哋斑飛機係18:25起飛，14:00嘅巴士喺15:20就會到機場咖喇,真係早左啲。但係下一斑巴士又會喺17:10先到機場，又好似遲得濟。我哋又唔想坐火車，無法啦，早就早啦！
去到機場check in完都係3:45pm，無咩做又食個炸豬扒、蠔飯先！
最後過埋immigration去左裡面嘅Excelsior Cafe飲多杯咖啡，就正式完成左我哋呢十日嘅蜜月之旅喇。
Day 9 涉谷 -> 新宿 -> 上野 -> 原宿
2010年2月9日
今日係honeymoon之旅嘅最後一個full day喇。我哋買左JR嘅one day pass (730yen)。
先出發去新宿，因為我要去京王百貨店。
點解要去呢度呢？事緣今次喺香港飛大阪嘅航班上，我食左一塊非常好味嘅朱古力餅乾，之後check internet知道東京只係有兩間百貨公司有得賣，其中一間就係京王百貨店喇。
其實我喺早一晚去新宿嘅時候已經偷偷哋去左京王搵到個counter咖喇，但係唔知係咪佢哋做緊promotion，所以有成五，六十人排隊，嚇左我一跳。今朝諗住再去碰吓運氣，點知一樣咁多人。。正想放棄，好彩K同我講，橫掂我哋都無咩特別地方要去，排啦。最後排左大概四十分鐘，一定要買盡佢啦！
離開新宿我哋出發去上野，先去まぐろ市場食個魚生飯。
之後想去二木之果子，但係唔知點解搵嚟搵去都搵唔到，可能我哋有好多年都無嚟過二木喇，唔通搬左？我哋記得二木對面係一所廟宇，但係我哋連間廟宇都搵唔到。。
行吓行吓忽然見到有間舖頭啲衫幾靚,忍唔住入去又放低左幾千yen。。
因為之前買嘅朱古力餅實在太重喇，所以我哋決定放棄搵二木。K就入去0101而我就去上野站對面嘅Yamashiroya玩具店買手信。
之後我哋就先返酒店放低啲戰利品，順便上網check吓二木嘅位置，發覺個舖頭接近御徒町站多啲，橫掂有one day pass，我哋決定再去！
出發前先去酒店樓下嘅Cold Stone食杯雪糕先！
今次終於搵到二木喇。
狂掃一輪手信後，我哋又再一次返酒店放低啲野。我哋鍾意住Excel Hotel嘅其中一個原因就係因為佢夠方便，連接住涉谷站，落雨都唔怕淋濕身咖。
我哋又再次出發喇，今次目的地係原宿。因為已經八點幾喇，好多舖頭都close左，我哋就沿住表參道一路行。過左Kiddyland，發覺有條細街好靚,裡面有好多小餐廳。再行入去會見到好多shops，例如Paul Smith Jeans, Adidas。。我發覺日本人好識佈置櫥窗，就咁影櫥窗都好開心。
之後轉左入另外一條細街，有好多設計學校。有設計衫嘅，又有設計手飾嘅。。
不經不覺原來都行左好遠喇，我哋行到去青山通，再轉返表參道，繞返去竹下通，最後到達我哋今晚食晚餐嘅地方 - 九州拉麵。我哋已經幫嚟過呢間舖頭好多次咖喇，不過亦有好多年無嚟過。入到去啲哥仔都好似以前一樣咁有活力同有禮貌，啲拉麵都保持到一向嘅水準。
食完都十一點幾喇，係時候返酒店休息喇！
Gateau Festa Harada : http://www.gateaufesta-harada.com/app/home.html
二木之果子 : http://www.nikinokashi.co.jp/
2010年10月5日 星期二
Day 8 熱川 -> 涉谷
2010年2月8日
早上7:00am就被太陽伯伯叫醒，打開窗簾，原來剛剛日出。
酒店風呂係喺5:00am男女交替，咁我哋當然喺食早餐前又浸一浸啦。今朝去嘅女湯就有四個露天風呂，仲好似jacuzzi咁，坐落去之後有按摩功能。可惜唔可以浸太耐喇，事關我哋book左8:30am要去餐廳食早餐呀！
早一晚check in嘅時候，職員已經問我哋要日式定美式早餐。我揀美式而K就揀日式。原來日式係有好多野食咖，又有魚又有蟹麵豉湯，而我嘅美式早餐就只係得個omlette，兩條香腸同一塊煙肉。。下次一定要揀日式早餐！！
食飽之後又係時候要check out喇，我哋今日要喺涉谷還車，所以唔想太遲出發。Check out時昨晚serve我哋食晚飯嘅嬸嬸都有出嚟幫手，之後所有職員都出嚟門口列隊歡送我哋,我仲同嬸嬸擁抱添，佢哋個個都super nice呀！
酒店reception嘅裝飾，我都買左一串返香港：
GPS顯示去涉谷Excel Hotel無料要三個幾鐘，就算唔塞車落到去都已經一點幾，都係立即出發喇！
我哋沿住個海行，沿路風景好靚呀！
一路上有好多賣海鮮嘅舖頭，好多都係用熱川出名嘅金目鯛魚做招牌，我哋尋晚同今朝都有食呢種魚咖：
望到東京。。。個牌喇！!
一路上都算順利，只係簡中有小小塞車，不過最弊就係去到涉谷之後個GPS顯示唔到點樣上Excel Hotel嘅停車場,只可以帶我哋去到附近嘅Mark City。我哋咁多行李都唔知點算，最後我哋決定先去左Nissan還車先再行返酒店。
還車過程都算順利，我哋當初做online booking嘅時候，係mark左一點鐘還車嘅。但係我哋4號大約三點零先拎車，所以雖然今日我哋三點幾先還車而Nissan嘅職員都想charge我哋2100yen，但係比我哋拗拗吓最後都係唔駛比late charge。
還車之後我哋就推住啲行李行去Excel Hotel喇，好彩唔係太遠，大概行左十分鐘就到。
幫我哋check in嘅先生叫吉田，佢無咩笑容，同溫泉酒店嘅職員完全無得比。我哋會喺呢度住兩晚，吉田提議我哋upgrade間房去King Size Bed，比多2000yen (我哋先前係訂左Semi Double Bed)，見係honeymoon，豪一豪啦！
呢個就係酒店望出嚟嘅view，見到繁盛嘅涉谷:
休息一陣就出發去新宿喇，行左幾間0101同埋伊勢丹。但係都無收穫。一來啲yen太貴喇，二來我哋喺輕井澤已經瘋狂大出血，所以嚟到新宿感覺啲野超貴。。買唔到野就食飯啦，今晚我哋就去左紀伊國屋樓下嘅和幸開餐。上次去日本食和幸嘅時候可能啲蠔唔係當做，所以menu上面無蠔，今次有喇！！我哋一人叫左一個豬扒set，另外叫左一客蠔 （有三隻）。
呢度嘅白飯，蜆仔麵豉湯，同埋椰菜係任添嘅，K飲左四碗蜆仔麵豉湯！
呢支柚子汁同啲椰菜簡直係perfect match！！
食飽要返涉谷喇。臨返酒店前K想搵Calpis Soda，但係好多汽水機都無。Family Mart, am/pm又凈係賣Calpis Water。唔緊要啦，行多一陣咪當散步囉，好彩最後都比我哋搵到！
Shibuya Excel Hotel : http://www.shibuya-e.tokyuhotels.co.jp/ja/
訂閱：
文章 (Atom)