10:00am check out 咗Hotel Fino, 本來諗住將D行李同車留喺酒店, 然後坐JR去大通駅時計台附近食早餐先出發去小樽, 不過後來覺得咁樣一來一回會好花時間, 所以最後都係直接揸車走.
個停車場好high tech, 將架車駛咗入個指定位置後, 個車場會自動關門, 然後架車就會自動咁俾人唔知吊咗去邊度.
離開酒店之後, 我哋決定先去二条市場食個海鮮井做早餐, 本來諗住呢度D車有晒GPS應該唔駛驚, 點知遇着修路, 所以攪咗好耐先去到個市場.
揾到一間食海鮮井嘅舖頭, 一坐底小二哥就攞咗隻毛蟹過嚟, 猛話 "哀絲、哀絲", 仲話原價3,300円, 特價2,800円俾我哋, 我同K當然無就範, 堅持食番個海鮮井.
食飽飽, 出發去小樽, GPS顯示無料路程大概要個零鐘. 沿路經過白之戀人朱古力廠, 梗係順便入去行吓啦.
由札幌去小樽沿途風景好靚.
今日無正式食過LUNCH, 但係經過小樽運河附近就進行咗掃街行動:
好味軟雪糕
燒帶子
夕張蜜瓜
燒粟米
雪印Parlour買嘅朱古力Sundae. 無錯, 又係雪糕...
今晚住喺築港嘅Grand Park Hotel, 前身係Hilton. 酒店隔籬就係Wing Bay Otaru, 有個小型outlet, 我終於忍唔住喺呢度買咗件衫, 因為天氣實在太凍喇. 個商場雖然舊舊哋, 但都有幾多嘢行, 除咗個小outlet, 仲有Namco Amusement Park, 同埋一個好似吉之島嘅supermarket.
夜晚去咗和樂食回転壽司, 可能因為太夜 (9:00pm), 回転帶上面無晒壽司, 唯有落order啦!
開頭唔知係乜, 攞上手先知係牙簽!
頭一round叫咗9碟壽司, K問我要唔要再order, 定係去第二間再食過, 吓!!
原來喺和樂後面, 係另一間我哋嘅飛佛 "牛角", 呢間係食炭燒肉嘅專門店. 入去問咗靚女姐姐佢哋收11:00pm, 我哋決定去番小樽運河影完夜景再返嚟食過!
牛角咁啱做緊個promotion, 2,600円任食90分鐘, 佢哋平日一碟燒肉閒閒哋收7、800円, 我哋如果食到7碟都歸本啦, 而且呢個set仲包埋甜品, K叫咗個Black Honey Kinako Vanilla ice cream (雖然唔知係乜,但係好好味), 我就叫咗個柚子sorbet. 埋單結果..我哋食咗21碟嘢…
